hadeelarfin:

أنا اللي هتفت ” سلمية “
لا أنا صايع
ولا بايع
سنين عمري اللي باقية بلاش
ولا حابب أشوف أمي
قلقها عليّا ما بيهداش
لا عاوز أشوفها شايلة الهم
وتبكي لو تشوف الدم
ولما تتسئل عني
تقول ده ضنايا راح ولا جاش

انا اللي هتفت ” سلمية ”
ولا كان نفسي اشم الغاز
ولا امسك طوبة في ايديا
ولا خرطوشة تحرقني

أنا اللي هتفت ” سلمية “
ما كانش في بالي ضرب النار
ولا اني انضرب برصاص
ولا إن عنيا تبقى نشان
لظابط مفتري قنّاص

أنا اللي هتفت ” سلمية ”
أنا اللي نزلت بهتافي
خلعت نظام
وحققت اللي كان فاكرينه
قال أحلام
ساعتها اتشلت فوق الروس
وقالوا عليّا أحلى كلام
ده كان في يناير الماضي
بداية العام
ومات أياميها صاحبي فؤاد
ومات خالد
ومات رامي
وراحت عين قريبي هشام
وعدّى الشهر بعده الشهر
وفاتوا عليّا زي الدهر
ودم الشهدا يفزعني
ويقلق راحتي كل ما أنام

ساعتها لقيتني متكتّف
وقلت لابدّ أعود أهتف
رجعت هتفت “سلمية ”
وقلت الدم مش للبيع
بورقة بعشرة أو ميّة
في ايدي ايه غير إني أهتف
فضلت أهتف
فضلت أهتف

وقلت يا ناس
ده أنا اللي هتفت ” سلمية “
قالولي لأ ونكَروني
وشفت الدم من تاني
وعاد المشهد الدامي
وده كان يوم ما مات مينا
عشان ما قبلش تاني الظلم
وراح يهتف

وزادت قايمة الشهدا عدد م الناس
في منهم صابته رصاصة أو اللي انداس
وزادوا الحزن والقهرة  
وعادوا الكرّة 100 مرة
وسال الدم من تاني
على جبينه وغرّق عمّته الحرة
ومن تاني
عشان خاطرك .. يسيل الدم يا طاهرة

وبعد ده كله !!
أنا اللي هتفت ” سلمية ”
ويسقط كل مِن خانوا
ويسقط كل مِن هانوا
ويسقط كل من وقفوا في وش جيل بيتحرّر
ويسقط كل من ضربوا
ويسقط كل من قتلوا
ويسقط كل من شطبوا سطور في تاريخ بيتسطّر
ومن تاني
رِخِص دمي وسال في شوارع التحرير
ما عادش بينفع التبرير
ورجعوا قالوا تستاهل !
لكن عارفين ؟ .. أنا أستاهل
عشاني كنت متساهل
ولاجل يكون في معلومكم
مفيش حرية بالساهل
ومهما يسيّحوا في دمي
ارادتي مش هتتكسّر
فدا بلادي تروح الروح
ولا أشوفها بتتعسكر